Ресей Сыртқы істер министрі Сергей Лавров 11 қазанда Лаоста өтетін 19-шы Шығыс Азия саммитіне қатысады. Бұл туралы Ресей Сыртқы істер министрлігінің ресми өкілі Мария Захарова мәлімдеді. «11 қазанда Вьентьянда Ресей Сыртқы істер министрі 19-шы Шығыс Азия саммитіне қатысады», — деді ол. Шығыс Азия саммиті – Оңтүстік-Шығыс Азия елдері қауымдастығы (АСЕАН) елдері басшыларының және олардың диалог бойынша серіктестерінің жыл сайынғы саммиті мен форумы. 2011 жылы ұйымның мүшелігі 18 елге кеңейтіліп, форумға АҚШ пен Ресей Федерациясының басшылары шақырыла бастады. Бірінші саммит 2005 жылы 14 желтоқсанда өтті. Шілденің соңында Сергей Лавров Лаостағы Шығыс Азия саммитінің министрлер кеңесіне қатысты. Бұл шараға ресейлік министрден басқа, АҚШ Мемлекеттік хатшысы Антони Блинкен, Оңтүстік Корея мен Сингапур өкілдері де қатысты.
