Фото авторы: ҚР МКҚК
Көктемде су басатын өңірлердің бірі – Ақтөбе. Су тасқыны салдарынан 4 мыңға жуық үй зардап шекті. Техникалық тексеру қорытындысы бойынша 1013 үй қауіпті деп танылды. Бұл мәселені шешу үшін ірі бизнес өкілдерінің қаражатына 500 тұрғын үй салынды, жалпы сомасы 25 миллиард теңгеге 513 дайын үй сатып алынды. Сонымен қатар, 3 мың тұрғын үйді жөндеу-қалпына келтіру жұмыстарына 9,8 млрд теңге өтемақы төленді. Бұл туралы Орталық коммуникациялар қызметінде Ақтөбе облысының әкімі Асхат Шахаров мәлім етті, деп хабарлайды Turantimes.kz ҚР ОКҚ баспасөз қызметіне сілтеме жасап.
Мемлекеттік қолдаудың арқасында 13 білім беру нысанын, 2 спорт нысанын және 1 денсаулық сақтау нысанын жөндеуге және салуға, сондай-ақ 47 шақырым жолды, 23 көпірді және 22 гидротехникалық құрылысты қалпына келтіруге қаражат толығымен бөлінді.
Дәстүр бойынша өңірді дамытудың негізгі салалары білім және денсаулық сақтау секторлары болды.
«Биыл 8 жаңа мектеп пайдалануға берілді. Жыл соңына дейін тағы екі мектептің құрылысы аяқталады деп күтілуде. Сондай-ақ, алдағы жылдары 11,4 мың оқушыға арналған 14 жайлы мектептің құрылысын аяқтап, пайдалануға береміз.– деді облыс әкімі.
Денсаулық сақтау саласында медициналық қызмет көрсету сапасын арттыру үшін «Ауыл денсаулығын жаңғырту» Ұлттық жобасы аясында облыста 29 жоба жүзеге асырылуда. 12 нысан пайдалануға берілді. Сонымен қатар, биылғы жылдың соңында тағы 6 нысан іске қосылады.