Суретті түсірген: portkuryk.kz
Маңғыстау облысындағы Құрық портында қуаттылығы жылына 1 миллион тонна астық қабылдайтын жаңа астық терминалы іске қосылды.Бұл туралы Turantimes.kz тілшісі хабарлады.
Қазіргі уақытта порт аумағындағы «Kaspi Grain Way» жеке серіктестігінің астық терминалы Қазақстанның түкпір-түкпірінен дәнді дақылдарды қабылдауға дайын. Жоба аясында бір мезетте 28 мың тоннаға дейін астықты сақтауға қабілетті 18 силос салынды. Түтіктің өнімділігі сағатына 300 тоннаны құрайды.
Терминал Қазақстаннан Иранға, Кавказ аймағы елдеріне және одан тыс жерлерге дәнді дақылдарды экспорттайды.
Бүгінде астық қоймаларында 14 мың тоннаға жуық арпа бар. Биыл осы порттан Құрық портының №4 стансасы арқылы Иранға 3500 тонна арпаның алғашқы партиясы жөнелтілді.
Бұл жоба Мемлекет басшысының нұсқауымен әзірленген Қазақстан Республикасының теңіз инфрақұрылымын дамытудың 2024-2028 жылдарға арналған кешенді жоспарын іске асыру аясында жүзеге асырылуда.