Бұған дейін Милтон дауылы салдарынан Германияға сапарын тоқтатқан АҚШ президенті Джо Байден келесі жұмада Берлинге барып, Германия канцлері және президентімен кездесуді жоспарлап отыр. Бұл туралы РИА Новости Spiegel басылымына сілтеме жасап хабарлайды.
«АҚШ президенті Джо Байден келесі аптада «Милтон» дауылы салдарынан тоқтатылған Германияға сапарының орнын толтыруды жоспарлап отыр», — деп жазды басылым.
Айта кетейік, Байден президент Франк-Вальтер Штайнмайермен және федералды канцлер Олаф Шольцпен ресми кездесулер өткізеді.
Кездесулер 18 қазан, жұмаға жоспарланған. Сапарды ұйымдастыруға Германия үкіметі мен қауіпсіздік органдары күш салып жатыр. Бағдарлама айтарлықтай қысқартылғаны белгілі. Жоспар бойынша Штайнмайер америкалық көшбасшыны Германия Федеративтік Республикасының «Ерен еңбегі үшін» медалімен марапаттайды.
Жаңа қысқа сапарда Украина мен Таяу Шығыстағы дағдарыстар аясындағы Батыстың одан арғы іс-әрекеттері де қарастырылады.
Бұған дейін Байденнің Зеленскиймен кездесуі тиіс Германияға сапарын тоқтатқаны хабарланған болатын. Оған АҚШ-қа жеткен Милтон дауылы себеп болды.