Фотосурет авторы: Атырау облыстық БАҚ қызметі
Атырау облысының әкімі Серік Шәпкенов «Goldbridge International Company» ЖШС басшылығымен кездесті. Кездесуде тараптар Атырау облысындағы қант өндірісі жобасын талқылады, деп хабарлайды Turantimes.kz тілшісі.
Серіктестік басшысы Лина Тайкен ауданда жылына 144 мың тонна қант өндіретін зауыт салуға ниетті екендіктерін жеткізді. Бұл туралы облыс әкімінің баспасөз қызметі хабарлады.
– Жоба тек Атыраудың ғана емес, бүкіл елдің қантқа деген қажеттілігін өтейді. Қант қызылшасынан ашытқы шығаратын жетекші қытайлық компаниямен тәжірибе алмасып, осы компанияның технологиясын жан-жақты зерттедік. Олар жобамызды қолдап, қажетті соманың 80 пайызын салады. Жобамызды Атырау облысында жүзеге асыру үшін 1,5 жыл қажет. Ресми құжаттар дер кезінде дайындалса, 2026 жылдың жазында зауытты іске қосып, қант қызылшасынан қант пен басқа да 4 өнім шығарамыз. Жобаны жүзеге асыру үшін жер телімін беріп, қолдау көрсетеді деп сенемін», — деді Л.Тәйкен.
Серік Шәпкеновтің айтуынша, қанттың 90 пайызы шетелден әкелінеді. Облыс басшысы «Голдбридж» ұсынған жобаны құптап, қажетті қолдау көрсететінін айтты.
– Бұл біз үшін қажетті әрі тиімді жоба. Атырау жері қант қызылшасын өсіруге қолайлы. Ауыл шаруашылығының әлеуетін пайдаланып, өнімімізді ішкі нарыққа жеткізіп, ауыл шаруашылығы саласын қалпына келтіруге айқын жол ашамыз деп ойлаймын. Біз өз тарапымыздан инфрақұрылым беруге дайынбыз», — деді С.Шәпкенов.
Жиын соңында аймақ басшысы жер телімін қарауды тапсырып, үшжақты меморандум құру үшін тиісті құжаттарды дайындады.