Суретті түсірген: atpress.kz
Адам өліміне кінәлі деп танылған азаматқа қатысты сот үкімі шыққанын Turantimes.kz тілшісі хабарлады.
Бүгін, 19 желтоқсанда Атырау қаласының №2 сотында 56 жастағы Амандық Сағынғалиев мырзаның өліміне қатысты іс аяқталды. Жәбірленуші «Дина» базарындағы қойма алдында аяусыз соққыға жығылғаннан кейін қайтыс болды. Үстіміздегі жылдың 5 маусымында болған жан түршігерлік оқиға бейнебақылау камераларына түсіп қалған. Ол әп-сәтте әлеуметтік желіге тарап, көпшіліктің назарын аударды. Сондықтан бұл іс қоғамда үлкен резонанс тудырды.
Бүгін судья Зәуре Қазақстан үкімді оқыды. Сотталушы ҚК-нің 106-бабының 3-тармағымен (денсаулығына қасақана ауыр зиян келтіру арқылы жәбірленушінің өліміне қасақана әкеп соғу қылмысы бойынша) кінәлі деп танылып, 8 жылға бас бостандығынан айырылды.
Сот үкімі әлі күшіне енген жоқ.
Естеріңізде болса, Қызылқоға ауданы, Қарабау ауылының тұрғыны марқұм Амандық Сағынғалиев қаладағы ірі сауда орталығына барып, «Газель» автокөлігін тоқтатып тұрған кезде абайсызда «Мерседес-Бенц» көлігінің есігін жұлып алған. Оны көрген шетелдік көлік иесі Мұхтар Ахмедов ұрып-соғады. Жантүршігерлік оқиғаның куәгерлерінің ешқайсысы оны тоқтатуға тырыспады. Ес-түссіз жатқан ер адам ауруханаға жеткізіліп, бес күннен кейін алған жарақаттарынан көз жұмды. Сот-медициналық сараптама жәбірленуші бас-ми жарақатынан, бас сүйегінің сынуынан және миына қан құйылудан қайтыс болды деген қорытындыға келді.