Фото авторы: Амандық САҒЫНТАЙҰЛЫ
Тұрмыстық газ баллондары Қазақстанда жасалмайды, алыс-жақын шетелдерден әкелінедіБұл туралы Turantimes.kz тілшісі хабарлады.
Қолданыстағы өндірістік қуаттар мен мүмкіндіктерді ескере отырып, «Қазақстан инжиниринг» АҚ «Тыныс» еншілес кәсіпорны мен «Петропавл ауыр машина жасау зауыты» АҚ өндірісті ұйымдастыруға және қызмет көрсетуге мүдделі. Бұл туралы ҚР Қорғаныс министрлігі Қорғаныс-өнеркәсіп кешені директорының орынбасары Асқар Тамаев мәлім етті. Оның айтуынша, бұл ұйымдар жылына 70 мыңға дейін тұрмыстық газ баллондарын шығаруды қамтамасыз ете алады.
«Өндірістік қуатты арттыру қажет болса, «Қазақстан инжиниринг» пен Индустрия және құрылыс министрлігі отандық газ баллондарын өндіруге қатысатын басқа да кәсіпорындарға қатысты мәселелерді шешуге дайын. Сондай-ақ, «Қазақстан инжиниринг» өз орнында ескі газ баллондарын жоюды ұйымдастыруға, кейін оларды техника жасау үшін шикізат ретінде пайдалану үшін қайта өңдеуге дайын», — деді спикер.
Индустрия және құрылыс министрлігі Қазақстан Республикасының аумағында тұрмыстық газ баллондарын өндіруді және жоюды ұйымдастыру бойынша 2025-2028 жылдарға арналған іс-шаралар жоспарын бекіту туралы Үкімет қаулысының жобасын әзірледі. Құжат мемлекеттік органдарға тексеруге жіберілді.