АСТАНА, 5 қараша. Қазақстан президенті Қасым-Жомарт Тоқаев пен Франция лидері Эммануэль Макрон Украинадағы жағдайға, оның гуманитарлық зардаптары мен әлемдік экономикаға тигізетін әсеріне алаңдаушылық білдірді. Бұл туралы келіссөздер қорытындысы бойынша қол қойылған екі президенттің Қазақстан мен Франция арасындағы стратегиялық әріптестікті нығайту туралы бірлескен мәлімдемесінде айтылған.
Тараптар «Украинадағы жағдайға», «гуманитарлық зардаптарға, сондай-ақ жаһандық экономикаға және ең осал елдердің азық-түлік қауіпсіздігіне әсер етуіне» терең алаңдаушылық білдірді.
Президенттер жаһандық және өңірлік деңгейде бейбітшілікті, қауіпсіздік пен тұрақтылықты ілгерілетуге деген ортақ ниеттерін қуаттады. «Біз халықаралық құқыққа және Біріккен Ұлттар Ұйымы Жарғысының негізгі қағидаттарына, атап айтқанда, егемендікке, тәуелсіздікке, аумақтық тұтастыққа және барлық мемлекеттердің халықаралық мойындалған шекараларының мызғымастығына құрметпен қарауға, сондай-ақ дауларды бейбіт жолмен шешуге берік ұстанымымызды ерекше атап өтеміз. » делінген мәлімдемеде.
Қазақстан Президенті 4-5 қарашада Францияда мемлекеттік сапармен жүр.