Фотосурет авторы: ҚБ баспасөз қызметі
Атырау облысының полицейлері жүргізушілерге жол ережесін сақтауды ескертеді, деп хабарлайды Turantimes.kz тілшісі.
Облыстағы қалалар мен аудандар арасындағы көлік тығыздығының артуына байланысты полиция патрульдік ротасының қызметкерлері республиканың маңызды тас жолдарында жол қауіпсіздігін қамтамасыз ету мақсатында рейдтік іс-шаралар ұйымдастыруда.
Мәселен, жыл басынан осы уақытқа дейін Доссор – Құлсары – Бейнеу республикалық маңызы бар автомобиль жолдарында 18 жол-көлік оқиғасы орын алып, 9 адам қаза тауып, 24 адам жарақат алған. Бұл туралы Polisia.kz хабарлады. Сараптамаға сәйкес, жол-көлік оқиғаларының басым бөлігі жүргізушілердің көлік құралының жылдамдығын сақтамауы және басып озуға тыйым салатын жол белгілеріне бағынбауынан болып отыр. Бұл ретте полиция патрульдік ротасының сарбаздары жол қозғалысы қауіпсіздігін қамтамасыз етудің барлық бағыттары бойынша өз міндеттерін атқаруда. Негізгі мақсат – тас жолдарда адамдардың қауіпсіз қозғалысы және жол-көлік оқиғаларының алдын алу.
– Ескерту жұмыстарынан басқа, біз «Кибер-Шериф», «Oracle Insight» бот-құрылғыларымен және ұшқышсыз аэрокамералармен жабдықталған автоматтандырылған патрульдерді қолданамыз. Құрметті аудан тұрғындары және қала қонақтары! Көлік жүргізу кезінде жол қозғалысы ережелерін қатаң сақтауды ескертеміз. Жолдарда абай болыңыз, дейді полицейлер.